La junanza
Mujiga de Sëlva
L daunì ie tla mans dla junanza.
Chësc dit ie per nëus deplù che mé na frasa, l ie la fundamënta dl lëur de nosta lia. L sustëni de musicontri jëuni ie per nëus de gran mpurtanza, ajache savon che la tradizions de al didancuei possa mé viver inant tres na cumenanza sterscia dl duman.
Plu che mé notes: sustëni cun cuer
Nosc sustëni reverda deplù che mé l aspet de mujiga. Dlongia l sustëni economich per la partezipazion a cursc de furmazion y proiec, ie nosc duvier zentrel chël de acumpanië bel plan, ma cun ntujiasm la generazion che vën docà al fé mujiga deberieda. Nscila ne va nosc nvestimënc nia mé de vieres de strumënc y furmazion, ma dantaldut de vieres dla legrëza dl suné.
Una na valeda y un n sonn: la Mujiga di Jëuni de Gherdëina
N cunlaurazion cun l’autra mujighes dla val, ons dat vita a na mujiga di jëuni che va sëura i cunfins di chemuns ora. Chësc proiet ie ntant deventà la realtà de basa:
- Cunzerc de uni sort: sibes per la festes da Nadel che da carnescià – nosta junanza mostra for gën chël che la sà da fé.
- Esperienzes deberieda: tlo iel da auzé ora l fin dl’ ena de proves cun l cunzert ala fin pra la utia de Ramitzler. che fej crëscer adum dassënn la grupa de jëuni.
- Trasmëter valores: La ne va nia mé de perfeziuné la mujiga, ma de crië na cumenanza che sebe da jì sëura i cunfins dla generazions ora. Bele tlo mpera i jëuni, coche nce pra Mujiga de Sëlva, che dut adum ie scialdi deplù, che mé la soma de la pertes singules.
I primes vares sun paladina
Da auzé ora iel i pitli cunzerc purtei dant da chisc jëuni a n majer publich ntan chësc ultimo instà. Dan uni cunzert dla Mujiga de Sëlva sun plaza de chemun, sunova la junanza n valgun pec per nvië via la sëira. L suzes che la à abù pra l publich ie stat da marueia! Ma chisc cunzerc fova deplù che mé na giaurida: I ie l puent danter „granc“ y „pitli“. Tlo vën metuda la fundamënta per n daunì de mujiga deberieda y la tëma dl’ejibizion trasfurmeda te emozion pura.
N’udleda al daunì
Per l duman se mbincions de avëi inant tan n grum de jëuni y jëunes mutivei, che à l dejidere de rujené tl lingaz universel dla mujiga un cun l auter. Nosc travert resta chël, de dé inant deberieda l messaje dla ueia de viver a nosc publich.
Galaria fotografica
